Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Prevista

frölicher | bietenhader. exposiziun annuala da las artistas e dals artists grischuns

Selina Frölicher (*1985) e Micha Bietenhader (*1985) furman ensemen il collectiv frölicher | bietenhader ed èn ils titulars dal segund premi d'art da l'Uniun grischuna d'art. La promoziun cumpiglia ina preschentaziun en il rom da l'exposiziun annuala e l'ediziun d'ina publicaziun cumplessiva. Selina Frölicher e Micha Bietenhader na chapeschan il computer, ils autpledaders u las cameras betg sco ina convenziun ch'ins sto dumagnar en ina moda u l'autra. Ils artists tschertgan ils sbagls dals apparats, guntgeschan lur funcziuns u opponan els vicendaivlamain. Uschia resultan maletgs ed installaziuns che mettan en dumonda la significaziun da las tecnologias da noss temp.
L'installaziun da medias CRUSH (titel da lavur) (2020) da frölicher | bietenhader en il Museum d'art dal Grischun deriva dal material fotografic da l'ovra Juxtapositions (2014). Onns a la lunga stattan ils maletgs digitals tals e quals sin in disc dir. Cur che frölicher | bietenhader guardan puspè ils videos, constateschan els che las datas dals maletgs èn sa decumponidas. Sco fragments d'ina regurdientscha èn restads enavos mo maletgs disfatgs. Las nianzas da las colurs, las relaziuns dals pixels u las structuras dals maletgs na percepeschan ins betg pli. Avant ch'ils maletgs sa dissolvan cumplettamain, extiran ils artists las datas restadas e las translateschan en ina installaziun specifica per in local. En il local d'exposiziun survegnan ils fragments digitals – sco correspundenza fisica – atgnas furmas. Ils artists laschan nascher da questas furmas ina structura fragmentada che producescha l'illusiun d'in maletg che procura per sia atgna extensiun en il spazi.
En l'installaziun CRUSH (titel da lavur) dattan Selina Frölicher e Micha Bietenhader agens corps en il spazi als maletgs decumponids ed illustreschan uschia l'instabilitad da la tecnologia. Il focus mettan els sin las ruttadiras, sin las largias e sin las irregularitads da la tecnologia. La lavur è ina reflexiun davart l'insuffizienza da las medias tecnologicas. La magia electronica da lur maletgs ans mussa l'atgna vita da las maschinas che na sa laschan mai controllar dal tuttafatg.
Tar l'exposiziun cumpara – en la chasa editura Edizioni Periferia – in catalog ritgamain illustrà cun contribuziuns da Damian Jurt, da Stephan Kunz e da Sarah Mühlebach.

Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00