Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Prevista

Camillo paravicini. premi d'art Manor Cuira
01.05.-15.08.2021​

Camillo Paravicini (*1987) realisescha en il rom dal premi d'art Manor Cuira sia exposiziun individuala la pli impurtanta fin ussa e consultescha en moda umoristica ed imprevisibla tut quai che vala sco vair u segir en il manaschi d'art. Sias lavurs fatgas a maun cun quità e precisiun paran adina maliziusas e levas. En moda divertenta neutralisescha el uschia nossas aspectativas envers l'art.

L'artist grischun collecziunescha en l'exposiziun en il Museum d'art dal Grischun per l'emprima giada ina gruppa d'ovras cumpletta d'ina pictura nova. En ils maletgs da format pitschen giran enturn da malaveglia figuras fabulusas che tschertgan la via a la surfatscha tras vettas da colur pastusas. Mai na savain nus cun segirtad, sch'ils gnifs da comic vulessan insumma esser visibels u sch'els èn gia puspè en fugia. Schebain che la moda da picturar expressiva e las tendenzas surrealas renvieschan als gronds maisters da quest champ sco Jean Dubuffet u Martin Kippenberger, tschorventa Camillo Paravicini l'attribuziun clera ad ina direcziun da stil. Circumdads da roms gigantescs sa collian ils maletgs cun il spazi vischin e sugereschan che quai tut è dapli che pictura. En il local sa chatta in grond profil tranter il banc da seser ed il biotop sin il tetg, che regorda ad in'ovra da construcziun modernistica. Sumegliant ad ina culissa da teater organisescha Camillo Paravicini en la colliaziun – tranter ils maletgs, ils roms e l'object – ina scenografia ch'envida a reflectar davart l'art. Las ovras daventan acturas che manchentan sapientivamain lur part u che sa schluitan aposta en il fauss toc. Schebain las acturas han la finala sbaglià l'inscenaziun u nus, resta avert.

Davart l'exposiziun cumpara in cudesch da la chasa editura Vexer cun in discurs tranter Camillo Paravicini ed il curatur Damian Jurt sco er cun texts da Jana Bruggmann, Gianni Jetzer, Claire Hoffmann, Stephan Kunz, Aoife Rosenmeyer e Sabine Rusterholz.

Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00