Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Actualitads

​Ludovica Carbotta. Ils Telamons
21.03.-02.08.2020
Vegn probablamain prolungada!

Cun sia preschentaziun en il Museum d'art dal Grischun salva Ludovica Carbotta (*1982) sia emprima exposiziun individuala en Svizra. L'artista taliana sa lascha inspirar da las ovras da la dinastia dals Giacomettis e sviluppa ina nova gruppa da sculpturas, che sa referescha al concept da la famiglia.

Tut las famiglias sa cumponan da differentas persunalitads. Gist uschè multifaras èn las furmas che Ludovica Carbotta dat a sias sculpturas. A mintga sculptura attribuescha ella in'atgna vegliadetgna cun elavurar differents scenaris e differentas interpretaziuns d'ina sculptura sumeglianta. Igl è lev da s'imaginar ina sculptura che sumeglia ina persuna pli veglia. Ma co vesa ora ina sculptura che correspunda ad ina persuna giuvna u ad in uffant? Ludovica Carbotta sa lascha manar da sia atgna memoria e creescha sculpturas che communitgeschan ina cun l'autra tras il diever da segns e d'ornaments. Sco sche l'artista dess ina furma fisica al temp, stattan – en l'exposiziun – in sper l'auter sco commembers da la medema famiglia il preschent, il futur ed il passà.

Sche Ludovica Carbotta sa basa plinavant sin il citat da Jorge Luis Borges «Spievels e paregliaziuns èn senza misericordia, perquai ch'els augmentan il dumber d'umans», metta ella en dumonda la famiglia sco furma da relaziun desiderabla, analisescha la rolla da la famiglia en la societad e metta la famiglia en relaziun cun aspects sco identitad u autodeterminaziun.

Sco in passà pers vegn – parallelamain a l'exposiziun en il Museum d'art dal Grischun – posiziunada ina sculptura en la natira per surpassar en questa moda il rom architectonic da la preschentaziun. Sco part da l'exposiziun vegnin nus, ils 9 da matg, ans metter sin via – ensemen cun Annina Sedláček e cun Ludovica Carbotta – per chattar questa sculptura messa a l'abandun e per la manar enavos en il ravugl da la famiglia.


Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00