Bündner Kunstmuseum Chur
Museum d’art dal Grischun Cuira
Museo d’arte dei Grigioni Coira

Actualitads

Cura che nus essan sparids. Quatter lavurs da video 
29.08.2020 - 22.11.2020

Las generaziuns futuras na vegnan betg a perdunar a nus. Lur sentenzia vegn ad esser unanima e lur tenuta irreconciliabla. Ellas na vegnan betg a raquintar istorgias eroicas da la conquista da la glina u dal triumf da l'internet. Ellas vegnan a guardar enavos ed a vesair l'explotaziun da materia prima, crisas da fugitivs, la destrucziun da valurs u la midada dal clima. En l'exposiziun Cura che nus essan sparids prendain nus la perspectiva da noss descendents ed observain il temp preschent cun ils egls da noss uffants futurs. Ils videos ans demascreschan sut ils egls da quels che nus avain ignorà. Els èn fragments da nossa ierta.

Il video In the Land of Drought da Julian Rosefeldt è ina interpretaziun cinematografica da l'ovra Die Schöpfung da Joseph Haydn ed ans mussa l'epoca dal post-antropocen. En il video suandain nus ina gruppa da scienziadas e scienziads che perscrutescha chats archeologics d'ina civilisaziun ch'è ha sepulì sasezza. SUPERFLEX mussa en il video Kwassa Kwassa la construcziun d'ina bartga da fibras da vaider che vegn duvrada per transportar migrantas e migrants tranter inslas en l'Ocean Indic. La traversada preschentada mussa, co che interess naziunals da pussanza traguttan il desideri d'ina existenza segira. Ina insla che serva sco destinaziun da la fugia è in departament d'ultramar da la Frantscha e pia ina part da l'Europa. En il video The Roots of Violence – San Giorgio da Yuri Ancarani ans mainan las sequenzas da maletgs en lieus zuppads d'instituts da finanzas. La destrucziun da documents sensibels daventa in simbol per in'economia da finanzas senza substanza, sin la quala sa basa nossa economia globala. Irma to come in Earnest da Julius von Bismarck ans guida entamez il stemprà Irma, ch'è furià l'onn 2017 tras la Caribica. En il video vesain nus abitadis inundads e palmas sfratgadas dal stemprà. L'artist transpona la forza elementara dal hurican en bels maletgs particulars fitg ralentads. Da quai resulta l'enconuschientscha che nus umans essan daventads l'impuls destructiv il pli grond da process ecologics.


program:
29.08. – 20.09.: Julian Rosefeldt, In the Land of Drought, 2015 /17
22.09. – 11.10.: SUPERFLEX, Kwassa Kwassa, 2015
13.10. – 01.11.: Yuri Ancarani, The Roots of Violence – San Giorgio, 2019/ 20
03.11. – 22.11.: Julius von Bismarck, Irma to come in Earnest, 2017

Museum d'art dal Grischun Bahnhofstrasse 35 CH-7000Cuira T +41 81 257 28 70 . info@bkm.gr.ch
Ma-Du 10.00 – 17.00 Gi 10.00 – 20.00