Cun la persvasiun che textilias èn munds surcusids, ha la graficra, artista da textilias e dissegnadra Beatrix Sitter-Liver (Cuira *1938) che viva e lavura a Berna regalà l'installaziun imposanta ch'ella ha fatg a chaschun da l'exposiziun "Archiv – 80 onns art grischun" al museum d'art dal Grischun.
Tras la preschentaziun dals set batlinis da mangola da 200 x 200 cm sin il palantschieu, al palantschieu sura u vid la paraid d'in local d'exposiziun plazzads dasper 60 fegls grafics (serigrafias e fotolitografias) daventan ils ponns che vegnivan utilisads per purtar fain sin ils prads da muntogna raquintaders robusts: Els rapportan d'ina pitschna vischnanca – il lieu d'origin da l'artista – e d'ina vita plain lavur ch'è però vegnida manada en accordanza cun la natira.
Durant 8 onns (1981–1989) ha Beatrix Sitter-Liver rimnà ils ponns e dà als purs persuenter novs tocs tessids a maun. La midada da la vita da mintgadi e pia la "mort" da las tradiziuns sa manifesteschan en il spazi, in mund ch'ins vesa adina pli savens mo sin fotografias, daventa percepibel.